ذره در اتكه نسبتله بتون عالملر
داخلم بنده ولى ذره اولورمى تقسيم
بى وجودم اوقدر كنيمى كندم كوره مم
ويره مز ظله وجود دركي قدَر عقل سليم
وارلغم بَللو ايدن معصيتمدر انجق
كورينان جسم خجالتده همان بويله جسيم
كيمه بهتان ايده يم عالمه معصوم كلدم
همده اولمش ايدم انواع نعمله تكريم
كچدى صافيّت ايله وقت صباوت صكره
ايتدى قانون طبيعت نيجه حسلر تفهيم
عقل وفكرم او قدر كورپه ايدى كلفتسز
خير وشر صورتنه قابل نقل وترسيم
بنى برقوت محسوسه ايدردى اجبار
بيله مزدم سببك فكريده ايتسم تعميم
اختيارم قومادي در بدر اولدم شويله
كو نيگون زائل ايدى صفوت ايله حال قديم
متأذى ايدم اوّل رتبه انك مكرندن
كوره مزدم ديه جك درديمى بر يار صميم
نه بيلوردم ديمه سه با كه اكر دوست سداد
مگر اوّل ملعنتك نامى ايمش نفس لئيم
اويله اولدم كه انك تربيت مگرى ايله
بكا حال اولمشيدى منكر اولان حال ذميم